یاز اکونون معلوماتینا گؤره عابدین خرم، استانین علم و فناوری پارکیندا ۱۱ تکنولوژیک و دانش‌بنیان لایحه‌نین آچیلیش مراسیمینده بو ایلین آدلانماسینا توخونوب دئدی: استانین اجرایی حاکمیتی دانش‌بنیان شرکت‌لرین راحاتجا بئجریب بؤیومه‌سینه آرخا دوروب اونا تدبیر قیلاجاقدیر.
او، دانشگاهلارداکی تئوریک لایحه‌لرین ایشه سالماغینین اهمیتینی وورغولاییب آرتیردی: دانشگاه و بوتون علمی مرکزلر جامعه‌نین احتیاجلارینی یئرینه یئتیرمک اوچون تولیدی‌لرده چابالاییب تزه مدرن تکنولوژی واسطه‌لریله تاریخی گئری قالماغیمیزین عوضینی آچمالیدیرلار.
خرم، کئچن ایلده خصوصی سئکتورون استان صنایعینه ۵مین میلیارد سرمایه یاتیردیغینا اشاره ائدیب دئدی: دانش‌بنیان شرکت‌لر بؤیوک صنایع‌لره گیریب اؤلکه‌میزین فرقلی ساحه‌لرده اقتصادین حرکت وئریجی قوه‌لری اولمالیدیرلار.
خرمـه گؤره دانشمندلرین، دانش‌بنیان شرکت‌لرین و تکنولوژی ساحه‌سینده چالیشانلارین بیر یئره ییغیشماسی، هم ده تزه ایده‌لری اولان کارخانالارین قورولماغی، تحقیق و تکنولوژی فوندلارین(صندوق) گوجلنمه‌سی و دانش‌بنیان محصوللارین صادراتینین چوخالماسی تبریزی بو ساحه‌ده اصل یئرینه یئتیره بیلر.
