حیاتیمداکی سحر خانیم نئچه پردهده
یازاکو- بیرینجی پرده، بیزیم نسل سحر خانیمی یاخشی تانییردی. اونون شعرلری یئنیلیگی، دویغونو و گؤزل دیلی بیر یئرده وئریردی. منده چوخلاری کیمی ۸۰لاردا سحر خانیمی تانیمیشدیم شعرلرین سئومیشدیم آما اؤزو همیشه ال چاتماز ایدی
به گزارش پایگاه خبری یازاکو- نوید محمدی نسب آباد،
ایکینجی پرده
اونون حافیندا یاخیندان تانیدیغیم ایکی شخصله چوخ دانیشمیشدیم.
مهندس صرافی، سحر خانیملا انقلابدان سونراکی خاطیرهلریندن دانیشمیشدی و او ایللرده برابر اورتاق پروژهلر آپاردیقلارینی دئمیشدی.اونلار ایکیسی برابر چاغداش
شعریمیزدن دیکلمهلر ضبط ائتمیشدیلر.
سعید موغانلیایسه بیر گئجه ائوینده سحر خانیم حاقیندا اوزون اوزون صحبتلر ائتدی.
سعیده “سحر خانیم ایندی هاردادی” سوالی وئرینجه سعید، چوخ تعجبله” ایللر بویودور هئچ کسین سحردن خبری یوخدور و آراشدیرمالاریمیزدا جوابسیز قالیب” جوابین وئردی.
*گاوچونجو پرده
بیر گون ایش یئریمده چالیشارکن، ائودهآل مجموعهمیزین زحمتلرین چکن امکداشیم دئدی: تلفون آرخاسیندا بیر خانیم مهندسی صرافیایله دانیشماق ایستهییر. تلفونو آلیب دانیشماق ایستهیینجه نئچه لحظه سکوتدان سونرا بیر خانیمین سسین ائشیتدیم.
سلام وئریب، مهندس صرافی بیزیم ایش یئریمیزده اولمادیغین آچیقلادیم.بیر نئچه سوال جوابدان سونرا کیم اولدوقلارین سوروشونجا دوغرو دوزگون جواب آلمادیم. بو دانیشیقلاردان سونرا نهدنسه تلفون آرخاسینداکی سس سحر خانیم اولدوغون حدس ووردوم.
سوروشدوم : سحر خانیم سیزسیز؟ بیر آن سکوتدان سونرا گولومسندی .
تخمینیمی تایید ائدینجه بغض بوغازیمی کسدی.
دئدیم: سحر خانیم بیلیرسیز تانیمادیغیز بو تلفون آرخاسینداکی اوغلان نئچه ایل سیزین بیر سسیزی ائشیتمک آرزوسوندایدی؟
گولوب دئدی:نییه نه اولاجاق ایدی کی؟
سونرادا مهندس صرافینین تلفون نومرهسین آلیب، تشکور ائدیب ساغاوللاشدی.بو ارتباطین نتیجهسی، اؤزو سوئدده یاشارکن تهراندا اولان کیتابلارینین ساتماغیمیزین باشلانقیجی اولدو.
دؤردونجو پرده
بیر هفته قاباق سید حیدر بیات جنابلاریایله دانیشیغیمین سونوندا دئدیم: ایکی سیدیمیزه چوخ ارادتیم وار بیری سید جعفر پیشهوری بیری سید حیدر بیات .اودا بویوردو:سئیدلریمیز چوخدو، مثال اوچون حبیب ساهیر و سحر خانیم.بو موضوع بهانه اولدو سحر خانیم حاقیندا دانیشیغیمیزا.
سون پرده
سعید تلفون آرخاسیندا آغلایاراق سحر خانیمین دونیاسین دییشمهسینین خبرین وئردی. اونو اؤلوموندن چوخ سون ۲۰ایلدهکی غریبلیگی اورگیمی سیندیردی.سحر خانیم ساوالان اتگینده اود پوسگوردو، آما آوروپایا گئدینجه سؤندو و بیزه قالان حسرت اولدو.
